وانا جوّا لجنة الامتحان ..

المـديـر العـــام · سجل فى : 25/10/2007

وانا جوّا لجنة الامتحان ..

أنا كنت طول الليل بزاكر
علشان يوميها أبقى فاكر
وجيت انام جالى أرق
ودا غير صداع يوم الامتحان
كان يوم غريب من أوّله
بس انا قولت هكمّله
ولا حتى هشغل بالى بيه
علشان احل فى الامتحان

ومشيت وانا عمّال اسمّع
فى اللى زاكرته كتير واجمّع
كل الحاجات والمحتاجات
قبل الدخول للامتحان
وقعدت فى اللجنة براقب
فى صحابى وكمان فى المراقب
وطلع معيد من عندنا
وخلاص بدأنا الامتحان

فجأة لقيتنى فى مشكلة
مش عارف اقرا الأسئلة
طب هعمل ايه بقى ياترى
وانا جوّا لجنة الامتحان
سطّرت ورقة الإجابة
وانا حالى يصعب ع الغلابة
أصفر وشكلى مكتئب
والاسم قاعد فى امتحان

ويدوب لصاحبى بشتكى
قالّى مفيش حاجة تتحكى
بص ف ورقتك واتكتم
علشان نظبّط الامتحان
بعديها دكتورنا وصل
قال معلومات زى العسل
مفهمتهاش ودا مش غريب
دى كفاية خضّة الامتحان

فكّرت مع نفسى ف هدوء
علشان احلّ كتير وافوق
وبدأت اشبّه ع الكلام
واكتب شوية فى الامتحان
والوقت عدّى وانتهى
ومليت ورقتى كلّها
وخرجت وانا كلّى قلق
بتمنّى اعدّى فى الامتحان

ونجحت فى المادة ياناس
والرأفة طبعاً دى الأساس
ودى بعد توفيق ربنا
وادى اللى شوفته فى الامتحان
لو كنت رايح لامتحان
رصّ اللى تعرفه فى اتزان
وادعى ولا تشيل همّها
هتلاقى نفسك فى الأمان

الموضوع ده على فكره بيحصلى كتييييير
ربنا يوفقنا جميعا فى الامتحانات

{.... توقيع ابن الاسلام ....}