مواصفات مشتركة بين طلبة أولي طب و كل الناس الكبار لاحظتها طبعا و كلنا مرينا بالمرحلة دي و ده مش عيب طبعا بس لما بتكبر بتحس انك كنت نايم في العسل و فجأة اتلطشت 10 اقلام علي وشك و كلهم فجأة مش

عارف ازاي فجأة مع انهم 10

المهم هتعرف طالب أولي طب الجديد بشوية حاجات و انت بس تبصله و انت هتعرفه علي طول

أولا :هتلاقيه بأه يمشي بطريقة مختلفة عن طريقة مشيته في الثانوية العامة أل يعني الواد رايح يعمل عمليه

حياة او موت

ثانيا : هتلاقيه طالع يجري علي شؤون الطلبة و عايز يعمل الكارنية و الدنيا زحمة اوي و مش عارف يدفع في

الخازنة و مهما تقنعه انه يستني شهر ولا اتنين لما الزحمة تخف ميسمعش كلامك طبعا عشان ياخد الكارنية و يتمنظر بيه علي زمايله بتوع ثانوية اللي راحو معهد قطن قسم ديدان صديقة للبيئة

ثالثا : بيلتزم اول اسبوع في المحاضرات و اقطع دراعي من فوق لو حضر تاني اسبوع بس طبعا بعد اما يسأل

طوب الارض و يتأكد ان مفيش غياب في المحاضرات

رابعا: عنده وسواس من جواه بيقوله اتعرف علي ناس جديدة ( و يفضل لو بنات طبعا ) مع انه هيقعد في وش زمايله في الدفعة 7 سنين ان مكانش اكتر يعني و هيعرف كل الدفعات

خامسا : تبتدي السكاشن و يا عيني علي السكاشن و دي كان الطالب مستنيها من زمااااااان اوي عشان عمال يسمع عن المشرحة و عن الجثث اللي فيها و نفسه يشوف الجثث دي و تلاقيه عمال بينه و بين نفسه يبني القصص اللي هيحكيها لاصحابه و اهل بيته بعد اول يوم ليه في المشرحة

سادسا : هينزل وهو فرحان مووووت يشتري بالطو ابيض شكله حلو و يشيله علي ايده و يمشي بيه رايح جاي في الشارع بتاعهم عشان الناس تقول عليه دكتور مع ان المنظر بيكون فلاحي اوي ولو يعرف انه علي اخر السنه هيأجر بالطو من المشرحة اللي فيهم امراض مكانش لا اشتري و لا اتمنظر

سابعا : يدخل سكشن الفسيولوجي لاول مرة و يسمع كده شوية كلام انه هيقيس الضغط و الافلام دي علي طول يجري علي البيت و ياخد فلوس و ينزل يشتري جهاز ضغط و سماعه و بررردو يشيل السماعه علي ايده وهو رايح جاي عشان يتمنظر مع انه يا حبيب قلبي جهاز الضغط ده هتبقي عايز تقلبه عداد كهربا بعد كده و مش هتعرف بس تقول ايه بأه اهي منظرة

ثامنا : بعد ما طلبة سنة اولي يتعلمو يقيسو الضغط هتطلع عند النافورة تلاقي كل واحد ماسك واحد صاحبه و معلق دراعه و عمال يقيسله الضغط و طبعا بيوهم نفسه انه سامع حاجه في السماعه مع ان صوت الضوضاء عند النافورة يخليه مش سامع أفكاره هو شخصيا
ده لو بيفكر يعني

تاسعا و أخيرااا : يمتحن الترم الاول و يتصدم و يتغير شكله شوية لانه عرف ان الموضوع مش بالطو و كارنيه بس و يمتحن الترم التاني و تلاقي اللي بيفكر يحول صيدله و مش عارف و اللي عايز يدخل ال 4 مواد كلهم دور تاني و يشيلهم كلهم و اللي نجح و جاب امتياز و ربنا وفقه
و سلملي علي جهاز الضغط و البالطو و الكارنية

　
　
تحياتى :mantheother